A muller e os espazos

Un proxecto posto en práctica no IES A Sangriña (A Guarda) ao longo de 36 horas, distribuídas en varios meses, cun grupo de 4º da ESO co que se fixo a curtametraxe “A supercapa”.  Esta curta foi o resultado dun obradoiro cuxo  obxectivo era realizar unha creación audiovisual conxunta nas fases de preprodución (idea, guión e preparación da gravación) e gravación. O tema transversal foi a igualdade de xénero. Para isto estruturouse o contido baixo o título “A muller e os espazos”,  xa que daba pé a tratar a situación da muller nos ámbitos público e privado.

O grupo participante caracterizábase pola súa diversidade e por ter unha maioría de adolescentes pouco interesados nas materias do seu curso. A directora do centro quería ofrecerlles actividades que despertaran a curiosidade, como unha horta, un ciclo de mecánica e este obradoiro, que estivo precedido por outro sobre os medos que serviu como punto de partida para consensuar normas e traballar conceptos que logo se reflectiron en “A supercapa”.

OBXECTIVOS
· Aprender e experimentar o proceso de videocreación
· Cuestionar os referentes audiovisuais
· Profundar na igualdade de xénero
· Fomentar a creatividade colectiva
· Crear e fortalecer os vínculos do grupo participante
· Nutrir e valorar as historias propias para afianzalas como referente
· Divertirse