Vaite Nordés!

Neste obradoiro creouse unha curtametraxe musical colectiva en 24 horas con persoas adultas. Durante tres meses (novembro de 2014 – xaneiro de 2015) Illa Bufarda e a cantante Mónica de Nut xuntáronse semanalmente en Cariño con trece persoas que nunca antes fixeran unha creación audiovisual. Traballaron conxuntamente a idea, aproveitando as historias propias do lugar e adaptándoas ao xénero musical. As persoas participantes implicaron ás súas familias e á veciñanza na gravación. Cos vídeos rematados fíxose unha estrea no auditorio municipal.

O grupo participante estaba composto por doce mulleres e un home, de entre 40 e 70 anos, que se apuntaron á actividade, que ofrecía o Concello de xeito gratuíto, por interese propio. A maioría xa se coñecían de antes, con máis ou menos trato entre elas. Foi un grupo moi acolledor coas formadoras e moi involucrado no proceso. Pese a non sentirse inicialmente capaces, pouco a pouco foron avanzando até facer unha curtametraxe musical.

OBXECTIVOS
· Aprender e experimentar o proceso de videocreación
· Recuperar o canto como expresión popular
· Fomentar a creatividade colectiva
· Crear e fortalecer os vínculos do grupo participante
· Nutrir e valorar as historias propias para afianzalas como referente
· Saír da rutina
· Divertirse